Kamil Zeynallı məhkəmədə ifadə verdi

Tanınmış idmançı Kamil Zeynallı da daxil olmaqla 7 nəfərə qarşı dələduzluqda ittiham olunan Emil Ağayevin cinayət işi üzrə məhkəmənin növbəti baxış iclası keçirilib.

Bakı Ağır Cinayətlər Məhkəməsində hakim Əli Məmmədovun sədrliyi ilə baş tutan prosesdə Kamil Zeynallı zərərçəkən qismində ifadə verib. Tanınmış idmançı təqsirləndirilən şəxs tərəfindən ona ödənilməli olan 17 min manat bu günədək qaytarılmasa da, o, dəymiş zərərlə bağlı iddiaçı olmadığını bildirib.

Bununla yanaşı, idmançı məhkəmədən törətdiyi əmələ görə təqsirləndirilən Emil Ağayevə layiqli cəzanın verilməsini istəyib.

Qeyd edək ki, təqsirləndirilən Emil Ağayev bir neçə nəfərin etibarından sui-istifadə edərək təmir-tikinti işləri adı altında həmin şəxslərə məxsus ümumilikdə 300 min manatı mənimsəməkdə ittiham olunur. Ona qarşı Cinayət Məcəlləsinin 178.3.2 – dələduzluq etməklə külli miqdarda ziyan vurma maddəsi ilə cinayət işi açılaraq ittiham irəli sürülüb.