Keçmək üçün “lotka” lazımdır | Günü qara olan Qarabaldır sakinləri

600-ə yaxın sakin arabaya möhtacdır. Çünki yolları o qədər bərbad vəziyyətdədir ki, heç bir sürücü avtomobilini bu əraziyə sürmək istəmir. Söhbət Oğuzun Qarabaldır kəndindən gedir.

Əsas yoldan kəndə qədər olan 4 kilometrlik məsafənin yararsız olmasından şikayət edən sakinlər ərazinin Sovet dövründən sonra asfalt üzü görmədiyini bildiriblər.

“Təcili tibbi yardım 15 dəqiqəlik yolu 45 dəqiqəyə gəlir. Çox acınacaqlı vəziyyətdəyik. Müəllimlər dərsə vaxtında çata bilmirlər. Qayıtmağa marşrut olmur, taksilər də baha gəlir. Qarabaldırın adını eşidən kimi “yolu bərbaddır, ora hara gedirik” deyirlər”, – sakinlər narazılıqlarını bildiriblər.

Məsələ ilə bağlı Avtomobil Yolları Dövlət Agentliyindən bildirilib ki, sözügedən kəndin yolunun yenidən qurulması nəzərdə tutulub:

“Maliyyə vəsaiti ayrılan kimi Agentliyimiz tərəfindən həmin yolda əsaslı şəkildə yenidənqurma işləri həyata keçiriləcək”.