Keçmiş bələdiyyə sədrinin qatili axtarılır

Astara rayonunda iki gün əvvəl itkin düşən 54 yaşlı Eynəli Əzizlinin meyiti mayın 3-də Şümrüd kəndinin meşə massivinə daxil olan ərazidə tapılıb. Onun üzərində kəsici-deşici alətlərlə yetirilmiş çoxsaylı xəsarət izləri aşkar olunub.

Bu barədə Rayon Prokurorluğuna məlumat verilib. Rayon hüquq-mühafizə orqanlarının əməkdaşları əraziyə baxış keçirib, istintaqa lazım olan sübutlar götürülüb. Eynəli Əzizlinin qətli ilə bağlı bəzi təfərrüatlar da məlum olub.

Belə ki, orta məktəbdə müəllim işləyən Eynəli Əzizli həmçinin sahibkarlıqla da məşğul imiş. Onun kənddə çox sayda mal-qarası və marketi olub.

Mərhumun meyiti müayinə olunması üçün Məhkəmə-Tibbi Ekspertiza və Patoloji Anatomiya birliyinin Lənkəran rayon şöbəsinə təhvil verilib.

Faktla bağlı Astara Rayon Prokurorluğunda Cinayət Məcəlləsinin qəsdən adam öldürmə maddəsi ilə cinayət işi başlanılıb. Qətli törətməkdə şübhəli bilinən şəxsin saxlanılması istiqamətində əməliyyat-axtarış işləri aparılır.