“Kefsiz olanda bahalı maşınlarıma baxıram” | Şükran Soltanov hansı məşhur ifaçının mühafizəçisi idi?

“Arzunun vaxtı” verilişinin budəfəki buraxılışının qonaqları idmançı, bloger Şükran Soltanov və anası Lətafət Soltanova olub.

Şükran Soltanov fəhləlikdən lüks həyata uzanan çətin yolundan və anasının fədakarlıqlarından bəhs edib:

“Bakıya köçəndə durumumuz çox zəif idi, valideynlərim işsiz idi. Anam bizi dolandırmaq üçün xadimə, qabyuyan işləyib, hətta bir müddət uşaq bağçasına sığınıb orada yaşamışıq. Mən də ailəmə dəstək olmaq üçün bazarda meyvə satmışam, fəhləlik etmişəm, günü 10 manata mühafizəçi işləmişəm. Elə günlər olub ki, yolpulu tapmırdıq, günlərlə ət, toyuq üzü görmürdük”.

Müəyyən müddət müğənni İradə İbrahimovanın mühafizəçisi işlədiyini deyən bloger lüks avtomobillərə olan marağının da elə o illərdən başladığını vurğulayıb:

“İlk dəfə İradə xanımın lüks maşınına minəndə özümə söz verdim ki, gələcəkdə mən də belə bir avtomobil alacağam. Bu gün gecə-gündüz çalışaraq, böyük əziyyətlərlə qarajımda 6 bahalı maşının, evlərin və böyük bir komandanın sahibi olmuşam. İndi kefsiz olanda qarajımı açıb avtomobillərə baxıram və keçdiyim zülmlü yolu xatırlayıb şükür edirəm. Mənim üçün ən böyük xoşbəxtlik isə vaxtilə çətinlik çəkən anama və ailəmə indi istədikləri lüks həyatı yaşada bilməkdir”.