Kəlbəcər atəşə tutuldu

Sentyabrın 5-i saat 01:35-də Ermənistan Silahlı Qüvvələrinin bölmələri İstisu yaşayış məntəqəsi istiqamətində yerləşən mövqelərindən Azərbaycan Ordusunun Kəlbəcər rayonunun İstisu yaşayış məntəqəsi istiqamətində yerləşən mövqelərini müxtəlif çaplı atıcı silahlardan atəşə tutub.

Müdafiə Nazirliyindən bildirilib ki, bölmələrimiz qeyd olunan istiqamətdə adekvat cavab tədbirləri görüb.

Müdafiə Nazirliyi həmçinin sentyabrın 5-i saat 00:05-dən 00:20-dək Azərbaycan Ordusunun bölmələri tərəfindən guya Ermənistan Silahlı Qüvvələri bölmələrinin Zərkənd yaşayış məntəqəsi istiqamətində yerləşən mövqelərinin atəşə tutulması barədə qarşı tərəfin yaydığı məlumatın tamamilə yalan olması barədə də xəbər yayıb.

“Ermənistan Müdafiə Nazirliyinin yaydığı bu məlumatı qəti surətdə təkzib edirik”, – deyə nazirlikdən bildirilib.