Klounu qətlə yetirməkdə təqsirləndirilən şəxs ikinci dəfə məhkum olunacaq

Bakıda klounluq fəaliyyəti ilə məşğul olan 41 yaşlı Namik İsrafilovu qətlə yetirməkdə təqsirləndirilən, əvvəllər Cinayət Məcəlləsinin bir neçə maddəsi ilə məhkum olunan 25 yaşlı Rəsul Ağazadənin cinayət işinin məhkəmə iclası başlayıb.

O, Bakı Ağır Cinayətlər Məhkəməsində Leyla Əsgərovanın sədrliyi ilə keçirilən prosesdə hakim qarşısına çıxarılıb. İlk hazırlıq iclası zamanı ittiham olunan Rəsul Ağazadənin anket məlumatları dəqiqləşdirilməklə yanaşı, məhkəmənin tərkibi elan olunub.

Proses zamanı məlum olub ki, iclasa yeni qoşulan təqsirləndirilən şəxsin vəkili cinayət işi ilə tanış deyil. Buna görə də müdafiəçi işlə tanış olmaq üçün məhkəmədən vaxt istəyib. Bunu nəzərə alan hakim növbəti prosesi dekabrın 18-nə təyin edib.

Qeyd edək ki, hadisə bu ilin aprelin 23-də Nərimanov rayonunda Akademik Həsən Əliyev küçəsindəki mənzillərdən birində qeydə alınıb. Paytaxt sakini Namik İsrafilovun üzərində xəsarətlər olan meyiti yaşadığı mənzildə aşkar olunub.

Onu qətlə yetirməkdə şübhəli bilinən Rəsul Ağazadəyə qarşı Cinayət Məcəlləsinin 120.2.11 – quldurluq, hədə-qorxu ilə pul tələb etmə, terrorçuluq və ya banditizmlə əlaqədar adam öldürmə maddələri ilə ittiham irəli sürülüb.