Kolbasa və sosislərdə nöqsanlar aşkarlandı

Qida Təhlükəsizliyi Agentliyi kolbasa və sosis məhsullarında aşkarlanmış yeni uyğunsuzluqlarla bağlı məlumat yayıb.

Belə ki, cari dövr ərzində ölkə ərazisində fəaliyyət göstərən ticarət şəbəkələrindən 70-i kolbasa, 39-u sosis olmaqla ümumilikdə 109 adda məhsuldan nümunə götürülərək müayinə üçün Agentliyin tabeliyində Qida Təhlükəsizliyi İnstitutunun müvafiq laboratoriyalarına təqdim olunub.

“Monitorinq zamanı sınaq nəticələrinə əsasən 11 istehsalçıya məxsus 21 məhsulda uyğunsuzluqlar müəyyən edilib ki, bunlardan 5 məhsulda uyğunsuzluq təhlükəsizlik göstəriciləri ilə, 16-da isə etiket məlumatları ilə bağlıdır. Bəzi məhsulların laboratoriya sınaqları aparılmaqla yanaşı, bu sahədə monitorinqlər davam etdirilməkdədir”, – deyə məlumatda qeyd edilib.

AQTA-dan həmçinin bildirilib ki, “Halal” adı ilə satışa çıxarılan kolbasa və sosislərin analizi nəticəsində həmin məhsulların tərkibində donuz əti aşkarlanmayıb. Agentlik tərəfindən məhsulların təhlükəsizlik göstəriciləri ilə bağlı uyğunsuzluq aşkarlanan 6 istehsalçı müəssisədə qanunvericiliyə uyğun yoxlamalar həyata keçirilib.

Yoxlamalar nəticəsində uyğunsuzluq aşkar edilmiş məhsulların dövriyyədən çıxarılması və satış şəbəkələrindən geri çağırılması ilə bağlı icrası məcburi göstərişlər verilib, 1 müəssisənin fəaliyyəti dayandırılıb, 4 məhsulun istehsalı qadağan edilib.