Könüllülərimiz dəstək aksiyasına qoşuldu

Türkiyədə baş vermiş və çoxsaylı insan itkisinə səbəb olmuş zəlzələdən dərhal sonra Prezident İlham Əliyevin tapşırığı ilə Azərbaycan tərəfindən zəlzələdən zərər çəkmiş Türkiyə xalqına yardım məqsədilə həyata keçirilən və xalqımızın da böyük dəstək verdiyi genişmiqyaslı tədbirlərə könüllü gənclər də qoşulublar.

Azərbaycan Könüllü Təşkilatlar İttifaqının baş katibi Vüqar Əliyev jurnalistlərə açıqlamasında bildirib ki, könüllülər ilkin olaraq Kahramanmaraş şəhərində məskunlaşacaqlar. “Qrupların fəaliyyət müddəti 14 gün nəzərdə tutulsa da, bu prosesin gedişindən asılı olaraq dəyişə bilər”, - deyə V.Əliyev əlavə edib.

Türkiyəyə yola salınan könüllülər zərərçəkmiş əhaliyə yardım prosesində öz köməklərini əsirgəməyəcəklərini bildiriblər.

Birliyin bu humanitar fəaliyyəti çərçivəsində Azərbaycan könüllüləri türkiyəli həmkarları ilə birgə zəlzələnin baş verdiyi bölgələrdə zərər çəkmiş vətəndaşlara yardımların paylanılması, əhalinin istiqamətləndirilməsi, qeydiyyat və müxtəlif əlaqələndirmə işlərində iştirak edəcəklər.