Kosmetik vasitələrin dəhşətli fəsadları üzə çıxdı | Mütəxəssisdən təcili xəbərdarlıq

Tayvanda kamera qarşısında kosmetik məhsulları yeyən bloger ölüb.

“Guava Beauty” adı ilə tanınan 24 yaşlı qız müxtəlif kosmetik vasitələrin dadına baxdığı videolar çəkib.

O, xüsusilə dodaq boyası və ənlik kimi məhsulları kamera qarşısında yeyərək izləyicilərinin diqqətini çəkməyə çalışıb. Bir müddət sonra gənc blogerin profilində onun qəfil öldüyünü göstərən paylaşımlar edilib.

Maraqlıdır, doğrudanmı blogerin ölümünə kosmetik vasitələri yeməyi səbəb olub? Bununla bağlı mütəxəssislərin fikirləri isə müxtəlifdir.

Qida mütəxəssisi Məhsəti Hüseynovanın sözlərinə görə, kosmetik vasitələrin yeyilməsi insan sağlamlığına ciddi zərər vura bilər:

“Bu məhsullarda istifadə olunan kimyəvi maddələr qaraciyər və böyrəklərin fəaliyyətini poza, digər daxili orqanlara zərər verə bilər. Eyni zamanda kosmetik vasitələrin tərkibində istifadə olunan kimyəvi maddələr hormonal balansın pozulması ilə yanaşı, ciddi allergik reaksiyalara səbəb ola bilər”.

Kliniki Tibbi Mərkəzin Toksikologiya şöbəsinin müdiri Azər Maqsudov isə bildirib ki, sözügedən boyalar və kosmetik məhsullar toksiki funksiyaya malik deyil:

“Onlar zəhərlənməyə səbəb olmurlar. Bizə müraciət edən azyaşlı uşaqlar belə məhsulları təsadüfən istifadə etdikdə xüsusi tibbi müdaxiləyə ehtiyac olmur”.

Ekspertlərin sözlərinə görə, sosial mediada izlənmə və məşhurluq uğruna edilən riskli hərəkətlər gənclər üçün ölümcül nəticələrə gətirib çıxara bilər. Bu kimi videoların platformalardan silinməsi və maarifləndirici tədbirlərin vacibliyi isə mütləqdir.