Kreditlə alınan "xoşbəxtlik" uçuruma aparır? - Toydan sonra illərlə borc ödəyirlər...

Mağazaların “Kreditlə al, rahat ödə!” reklamları, blogerlərin dəbdəbəli həyatları və daha nələr. Günümüzdə xoşbəxtlik çox zaman maddi əşyalarla ölçülür.

Bəs kreditlə alınan bu xoşbəxtlik həqiqidirmi, yoxsa müvəqqəti bir illüziyadır?

Baku TV paytaxt sakinlərinin mövzu ilə bağlı fikirlərini öyrənib. Sakinlərin bir çoxu kreditdən uzaq olmağı tövsiyə edib.

“Pulun yoxdursa, evlənmə, nə məcburdur. Toydan sonra illərlə borc ödəyirlər”, ‒ sakinlərdən biri söyləyib.

Bəs mütəxəssislər bu məsələyə necə baxır?

İqtisadçı Eldəniz Əmirov deyir ki, 2025-ci ilin fevral ayının sonuna olan göstəriciyə əsasən, Azərbaycanda 29 milyard 402 milyon manatlıq kredit qoyuluşu formalaşıb. Bunun da böyük hissəsi ‒ 17 milyarddan çoxu ev təsərrüfatlarına düşür:

“Ümumilikdə artım dinamikasında istehlak kreditləri dayanmadan artır. Bunun müsbət tərəfləri ilə yanaşı, ciddi mənfi tərəfləri də var”.

Psixoloq Dəniz Umarovanın sözlərinə görə, müəyyən bir məhsulun əldə edilməsi insanlarda özünəinam və xoşbəxtlik hissini artırır. Eyni zamanda cəmiyyətlə ayaqlaşmaq fürsəti yaradır. Amma bu, müvəqqəti xarakter daşıyır:

“Zamanla xərclərin artması bir sıra psixoloji narahatlıqlara səbəb olur. Bəzən bu hal inklüziv xarakter daşıyır – real problemlərdən qaçmaq, mənfi emosiyalarla mübarizə, özünü təsdiqləmə ehtiyacı fonunda meydana gəlir”.