Laçından qaçqın düşən 110 yaşlı Fatma nənənin nağıl kimi hekayəsi - Baku TV

“Laçın çox gözəl yerdir. Havası da qəşəngdir, evləri də. Hər şey gözəldir. Buraya gəldiyimə görə o qədər sevinirəm ki”.

Bu sözləri dağlar qoynunda yerləşən, füsunkar təbiəti ilə seçilən Laçında dünyaya göz açan və illər sonra doğma yurduna qayıdan 110 yaşlı Fatma Kərimova söyləyib.

Fatma nənə qaçqın düşən vaxt uşaqlığının, gənclik illərinin və ömrünün böyük bir hissəsinin xatirələrini də demək olar ki, yaddaşında özü ilə aparıb.

İllərlə qurub-yaratdığı evindən-ocağından nəsə götürə bilməsə də, vətən torpağından topladığı bitkini də yanında daşıyıb. İndi evinin eyvanından Laçının gözoxşayan mənzərəsini, yenidən dirçələn yurd yerini qürurla izləyir.

“Bu bitkini 40 il əvvəl Mahmudbulağı kəndindən yığmışam. Müharibə zamanı qaçqın düşəndə çamadanıma qoyub özümlə aparmışdım. İndi isə yenidən qaytarıb bura gətirmişəm. Hələ də qəşəng iyi gəlir”, – deyə F.Kərimova bildirib.