Limon suyu içənlərlə bağlı araşdırmanın nəticəsi gözlənilməz oldu

Səhər limonlu ilıq su içməyin arıqlamağa və həzmi yaxşılaşdırmağa kömək etdiyi deyilir.

Sosial şəbəkələrdə istifadəçilərin və hətta diyetoloqların acqarına bu içkini istehlak etməyin kalorilərin yanmasına yardım etdiyini, toksinlərin yığılmasını azaltdığını, immunitet sistemini gücləndirdiyini, həzmi yaxşılaşdırdığını və dəriyə müsbət təsir etdiyini iddia edən çoxlu videolar var.

Amerikalı elm adamları bu məsələni daha ətraflı araşdırmaq qərarına gəliblər və bu içkinin həqiqətən fayda gətirib-gətirmədiyini təhlil ediblər. Nəticələr gözlənilməz olub. Müəyyən edilib ki, digər yüksək kalorili mayeləri bu içki ilə əvəz etsəniz, həqiqətən arıqlamağınıza kömək edə bilər.

Bununla belə, limon suyunun özünün maddələr mübadiləsinə və ya yağların yandırılmasına birbaşa təsiri olduğuna dair heç bir elmi sübut yoxdur. Buna görə də ekspertlər belə qənaətə gəliblər ki, bu içki orqanizmin nəmləndirilməsini saxlamağa kömək edən adi sudan başqa bir şey deyil. Onun heç bir təsiri yoxdur.

Qeyd olunub ki, limonun tərkibində immunitet üçün vacib olan çoxlu “C” vitamini var, lakin hər gün maye şəklində içmək orqanizmin müdafiəsini gücləndirmir.