Magistraturaya qəbul: 4 minə yaxın yer niyə boş qaldı? | Ekspert səbəbləri açıqladı - Baku TV

Dövlət İmtahan Mərkəzi 2026–2027-ci tədris ili üzrə magistraturaya qəbul müsabiqəsinin nəticələrini açıqlayıb. Nəticələrə əsasən, 3 843 plan yeri boş qalıb.

Təhsil eksperti Ramin Nurəliyev hesab edir ki, bunun əsas səbəblərindən biri magistraturaya qəbul imtahanının mövcud formatıdır.

Ekspertin sözlərinə görə, bu il magistraturaya 23 min nəfər müraciət edib. Onlardan 15 721 nəfər müsabiqə şərtlərini ödəyib, 13 845 nəfər isə qəbul olunub:

“Dövlət tərəfindən ayrılan plan yerlərinin sayı müsabiqə şərtlərini ödəyənlərin sayından çox olub. Nəticədə, 3843 yer boş qalıb”.

Ramin Nurəliyev bildirib ki, hazırkı qəbul modeli beynəlxalq təcrübəyə uyğun deyil. Onun sözlərinə görə, bir çox ölkələrdə magistraturaya qəbul əsasən bakalavr üzrə akademik göstəricilər (GPA), CV, tövsiyə məktubları və digər nailiyyətlər əsasında aparılır:

“Tarixçi, filoloq və ya coğrafiya müəllimi magistraturaya qəbul olmaq üçün riyazi məntiq, informatika və xarici dildən imtahan verir, amma öz ixtisası üzrə sualla qarşılaşmır. Bu, ciddi problemdir”.

Ekspert hesab edir ki, magistratura qəbulunda ixtisas fənləri də imtahana daxil edilməlidir. Onun fikrincə, mövcud sistem xüsusilə humanitar ixtisas məzunlarının aşağı nəticə göstərməsinə və magistratura təhsilindən imtina etməsinə səbəb olur.