Marsdakı müəmmalı cizgilərin əsl səbəbi açıqlandı

Mars səthindəki qara yamac cizgiləri uzun müddət duzlu suyun varlığına işarə kimi dəyərləndirilirdi. Lakin son 10 il ərzində alimlər bu cizgilərin, doğrudan da, su ilə əlaqəli olub-olmadığını dəfələrlə təhlil ediblər, yeni məlumatlar toplayıblar və fərqli fikirlər irəli sürüblər.

Aparılan genişmiqyaslı araşdırmalar cizgilərin suya deyil, başqa təbii amillərə bağlı ola biləcəyini göstərir.

Araşdırmanın nəticəsinə görə, bu cizgilər "təkrarlanan yamac cizgiləri" adlandırılan müvəqqəti quruluşlardır və maye su və ya donmuş maddələrlə əlaqələndirilmir. Yarım milyon cizginin heç birində müəyyən istiqamətlilik, temperatur artımı və ya rütubətlə bağlılıq tapılmayıb.

Alimlərin təhlillərinə əsasən, bu cizgilər, əslində, Mars atmosferindəki küləyin sürətində artım və səthdə toplanan tozun təsiri ilə meydana gəlir. Yəni Mars səthindəki bu qara izlərin əsas mənbəyi maye su deyil, küləyin daşıdığı tozlar və qum hərəkətləri kimi təbii geoloji proseslərdir.