Masazır sakinləri sahibsiz küçə heyvanlarına görə təşviş içindədir

Tovuzda 10 yaşlı uşağın quduzluqdan dünyasını dəyişməsi cəmiyyətdə ciddi narahatlıq doğurub. Hadisədən sonra ölkənin müxtəlif bölgələrində, o cümlədən Abşeron rayonunun Masazır qəsəbəsində sahibsiz itlərlə bağlı vəziyyət yenidən gündəmə gəlib. Masazır sakinlərinin sözlərinə görə, qəsəbədə sürü halında gəzən sahibsiz itlər təhlükə yaradırlar və məktəbə gedən uşaqlar daxil olmaqla, insanlara hücum edirlər. Sakinlər gecələr küçəyə çıxmağın mümkünsüz olduğunu bildirirlər. Məsələ ilə bağlı Abşeron Rayon İcra Hakimiyyəti və Masazır bələdiyyəsi tərəfindən açıqlama verilib. Bildirilir ki, yaxın vaxtlarda Abşeron rayonunda Sahibsiz Heyvanlara Qayğı Mərkəzi yaradılacaq və bununla bağlı sənədləşmə işləri yekunlaşmaq üzrədir. Hazırda artıq rayon ərazisində ətraf mühit üçün təhlükəli ola biləcək sahibsiz itlər sivil qaydada tutularaq Qayğı Mərkəzlərinə daşınır.