Maşın bazarında parklanma qalmaqalı | 50 qəpik əvəzinə 5 manat istədilər - Baku TV

Sürücülərin sözlərinə görə, “8-ci kilometr maşın bazarı”na daxil olarkən adətən 50 qəpik ödəniş edirlər. Lakin əraziyə tez-tez gəlib-getdikdə ödəniş məbləği artır. Hətta bəzi hallarda 5, 6, 10 manatlıq ödəniş tələb olunur.

Sürücülər hesab edirlər ki, bu yanaşma məntiqsizdir. Çünki bir məhsulu daha çox aldıqda və ya hər hansı xidmətə daha çox müraciət etdikdə adətən endirim tətbiq olunur. “8-ci kilometr maşın bazarı”nda isə bunun əksi baş verir: əraziyə nə qədər çox gəlib-gedirsənsə, bir o qədər çox ödəniş etməlisən.

Sürücülər bu qaydadan narazıdır və şikayətlərini bildirirlər. Onların sözlərinə görə, ödəniş etmədən bazarın ərazisindən çıxmaq da mümkün deyil. İlkin olaraq 50 qəpik olan məbləğ sonradan artaraq hətta 10 manata qədər yüksələ bilir.

Sürücülər səbəbini soruşduqda isə cavab ala bilmədiklərini deyirlər. Bildirilir ki, bəzi hallarda bazarın çıxışındakı əməkdaş qapını və pəncərəni bağlayaraq sürücülərlə danışmır.

Məsələ ilə bağlı bazarın nümayəndəsi Xəyal Babayev bildirib ki, sahibkarlar üçün ayrıca 5 manatlıq tarif müəyyənləşdirilib:

“Tez-tez bazara girib-çıxan şəxslər artıq sahibkar kimi hesablanır. Hər gələnin sahibkar olub-olmadığını müəyyən edə bilmərik. Rəhbərlik özü bu qaydada tənzimləyib və belə tarif müəyyənləşdirib ki, maşınların giriş-çıxışı az olsun”.