Media və DTX birgə məlumat yaydı | Saxlanılanlar var

Son günlər bəzi sosial şəbəkələrdə Azərbaycan-Ermənistan sərhədində gərginliyin artması ilə bağlı əsassız məlumatlar, saxta xəbərlər yayımlanır.

Ordumuzda şəhidlərin və yaralıların olması, qoşun birləşmələrinin və ağır artilleriya silahlarının hazırlıq vəziyyətinə gətirilməsi ilə bağlı dezinformasiyalar var. Hətta Laçın rayonu ərazisində komendant saatının tətbiq edildiyi də bildirilib.

Medianın İnkişafı Agentliyi və Dövlət Təhlükəsizliyi Xidmətinin birgə yaydığı məlumata görə, cəmiyyətdə narahatlığın yaranmasına səbəb olan bu kimi məlumatları yayan şəxslər müəyyən olunaraq tutulub.

Dövlət Təhlükəsizliyi Xidməti tərəfindən aparılan araşdırmalar nəticəsində Azərbaycan vətəndaşları – 1977-ci il təvəllüdlü Əliyev Rəşad Balağa oğlu və 1973-cü il təvəllüdlü Məlikov Pərviz Ramiz oğlunun belə məlumatları yaymalarının qarşısı alınaraq zəruri hüquqi prosedur tədbirlər həyata keçirilib.

Medianın İnkişafı Agentliyi və Dövlət Təhlükəsizliyi Xidməti sözügedən əməllərin törədilməsinin ciddi hüquqi məsuliyyətə səbəb olduğuna dair xəbərdarlıq edib. Media subyektləri və jurnalistlərə sosial şəbəkələrdə yayımlanan qeyri-dəqiq, mənbəyi bilinməyən məlumatlardan istifadə etməmək tövsiyə olunur.

Aidiyyəti qurumlar vətəndaşları bu kimi hallara qarşı hər zaman prinsipiallıq nümayiş etdirməyə, sosial şəbəkələrdə yayılan, rəsmi mənbələrə söykənməyən əsassız informasiyalara inanmamağa çağırır.