Məktəbdə təmir işləri dayanıb? | "Uşaqlarımızın taleyi bilinmir": Valideynlərin narazılığı böyüyür

Qobu qəsəbəsində yerləşən 3 nömrəli tam orta məktəbdə təhsil alan şagirdlərin valideynləri Baku TV-nin qaynar xəttinə müraciət edərək narahatlıqlarını bildiriblər.

Məktəb iki korpusdan ibarətdir. Birinci korpus təmir olunaraq istifadəyə verilib. Burada 3-cü və daha yuxarı sinif şagirdləri təhsil alır. İbtidai sinif şagirdlərinin təhsil aldığı ikinci korpusda isə hazırda təmir işləri aparılır.

Valideynlərin narahatlığı ondan ibarətdir ki, yeni tədris ilinin başlanmasına sayılı günlər qalıb, lakin məktəbin ikinci korpusu hələ hazır deyil.

“Bizə dedilər ki, yanvar ayına kimi hazır olacaq. Uşaqlarımızı Hökməli məktəbinə göndərdilər. Yollarımız bərbad idi. Şagirdlər də, müəllimlər də əziyyət çəkirdilər”, – valideynlərdən biri bildirib.

Başqa bir valideyn isə deyib:

“Mənim bir evimdən dörd uşaq gedir. Bu illər ərzində bütün günü yollarda ağlayırdım. Uşaqlarım palçığın içində qayıdırdılar. Hər gün direktora şikayət edirdik. “15-i məktəb hazır olacaq” deyirdilər. İndi isə məktəb hazır deyil”.