Söyüşlər havada "uçuşdu" | Qobuda torpaq alıb ev tikdi, yolunu bağladılar - Baku TV

Abşeron rayonunun Qobu qəsəbəsində vətəndaşın evinə gedən yolun bağlandığı iddia olunur. Nəticədə, sakin evinə qonşusunun həyətindən keçməklə gedib-gəlmək məcburiyyətində qalıb.

Şikayətçi Hümbət Bəşirovun sözlərinə görə, o, 2013-cü ildə torpaq alıb, 2023-cü ildə isə həmin ərazidə ev tikib. Lakin sonradan torpağın satılması və qonşu ərazidə ev inşa edilməsi nəticəsində onun evinə gedən yol bağlanıb.

Hümbət Bəşirov bildirib ki, ərazidə ev tikilərkən yolun mövcudluğu barədə məlumat verilsə də, sonradan keçid bağlanıb.

“Bir gün gəldim ki, mənim yolumu kəsiblər. Bələdiyyə torpağı satıb, qonşu da həmin yeri alıb. Qonşu imkan vermir ki, gedib-gəlim. Bax, bu iki evin arası mənim yolumdur. Evi tikəndə buradan hasar çəkdi. Torpağı satan adam da bilirdi ki, bura yoldur. Ona da deyib ki, darvazanı oradan qoyarsan, bura vətəndaşın yoludur, qonşunun yoludur. Amma sonra gəlib mənim yolumu da kəsdi. İndi məcburam ki, buranı qırıb özümə keçid açaraq gedib-gəlim”, – deyə şikayətçi qeyd edib.

Hümbət Bəşirov məsələ ilə bağlı aidiyyəti qurumlara, o cümlədən bələdiyyəyə müraciət etdiyini, lakin problemin hələ də həllini tapmadığını bildirib. Onun sözlərinə görə, bələdiyyə yolun açılacağını vəd etsə də, bunun nə vaxt həyata keçiriləcəyi məlum deyil.