Məktəblərə pulsuz avtobus veriləcək? | Valideynlərin maşınları həm tıxac yaradır, həm də...

Dayanma-durma işarəsi, eləcə də yaxınlıqda avtodayancaq və ərazidə parkinq sistemi olmasına baxmayaraq, təhsil ocaqlarının önündə avtomobil saxlayıb övladının təhlükəsizliyini düşünən vətəndaşlar həm sürücülərə, həm də piyadalara təhlükə yaradırlar.

Qeyd edək ki, təhsil ocaqlarının ərtafında dayanma-durma qaydalarının pozulması halları aşkar edildikdə, həmin şəxslər “Yol hərəkəti haqqında” qanunun 52-ci maddəsinə əsasən cərimə olunurlar.

Nəqliyyat eksperti Samuran Səmədbəylinin sözlərinə görə, məktəblərin önündə dayanan avtomobillərin qarşısını almağın tək yolu uzun illərdir beynəlxalq təcrübədə nümunəsi olan ödənişsiz məktəb avtobusları xidmətinin yaradılmasıdır:

“Əgər hər məktəb üçün 20-30 nəfərlik avtobuslar ayrılsa, valideynlər öz şəxsi avtomobili ilə məktəbə gəlməkdən imtina edər”.

Milli məclisin Elm və Təhsil Komitəsinin üzvü Elçin Mirzəbəyli hesab edir ki, əsasən bu cür problemlər məktəb himayəçilərinin hesabına öz həllini tapır. Azərbaycanda isə təhsil sisteminin inkişafına fərdi olaraq könüllü dəstək vemək anlayışı hələ formalaşmayıb.

“Ölkədə mövcud olan hər məktəb üçün bir neçə avtobus ayrılmalıdır. Bu da çox böyük vəsaitdir”, – o vurğulayıb.

Elm və Təhsil Nazirliyindən isə bildirildi ki, bu istiqamətdə konkret plan yoxdur və bu haqda müvafiq dövlət qurumları arasında müəyyən fikir mübadilələri aparılıb.