Mənfi xüsusiyyətlər insanları daha cəlbedici edir? - Araşdırmanın nəticəsi heyrətləndirdi

Edinburq Universitetinin tədqiqatçıları müəyyən ediblər ki, narsist olanlar, manipulyasiya edənlər və duyğusuz kişilər potensial tərəfdaşları cəlb etmirlər.

Amma uzun müddətdir ki, eqoist, manipulyasiya edən və laqeyd kişilərin qadınları daha çox cəlb etdiyi deyilirdi.

Alimlərin apardığı yeni araşdırma nəticəsində məlum olub ki, şəxsiyyətin pis xüsusiyyətlərinin yüksək səviyyədə olması onu daha cəlbedici etmir. Əksinə, potensial partnyorlar bu xüsusiyyətlər üzrə aşağı bal toplayan insanlara, xüsusən də uzunmüddətli əlaqələrə üstünlük verirlər.

Müəlliflər pis xüsusiyyətlərə malik insanların daha cəlbedici qəbul edilib-edilmədiyini müəyyən etmək üçün iki təcrübə aparıblar.

İlk araşdırmada hipotetik tərəfdaşların cəlbediciliyini qiymətləndirmək istəyən 475 nəfər iştirak edib. İştirakçılara aşağı, orta və ya yüksək səviyyəli qaranlıq şəxsiyyət xüsusiyyətlərini əks etdirən davranış təsvirləri ilə müşayiət olunan fotoşəkillər göstərilib.

794 nəfərin qatıldığı ikinci araşdırmada görünüşün reytinqlərə təsirini aradan qaldırmaq üçün təqdim olunan üzlərin sırası təsadüfi seçilib. Hər bir halda subyektlər hipotetik tərəfdaşların həm qısamüddətli, həm də uzunmüddətli əlaqələr üçün cəlbediciliyini qiymətləndiriblər.

Məlum olub ki, qısamüddətli münasibətlərdə iştirakçılar üstünlüklərindən asılı olmayaraq daha çox pis xüsusiyyətləri az olan partnyorları seçirlər. Üstəlik, uzunmüddətli münasibətlərdə də bu cür xüsusiyyətlərin səviyyəsi aşağı olan insanların cəlbediciliyi daha yüksək olub.

Müəlliflər vurğulayırlar ki, real həyatda cəlbediciliyin dərk edilməsi bir çox amilləri, o cümlədən qarşılıqlı əlaqə və şifahi olmayan ünsiyyəti əhatə edir.

Amma yalnız şəxsiyyət xüsusiyyətlərinə etibar etsək, “bad boys” – “pis oğlanlar”, kobud, laqeyd kişilər və “femme fatale” – “ölümcül qadınlar”, yəni hədsiz cazibədar, təhlükəli xanımlar heç bir xüsusi çəkiciliyə malik deyillər.