“Məsuliyyəti tələbə daşıyır” | Kimlər təhsil krediti barədə imtina cavabı alır? - Baku TV

Təhsil kreditinə müraciət edən tələbələrin bir qismi müəyyən meyarlara cavab vermədikləri üçün müraciətlərinə imtina cavabı alır.

Bu barədə Təhsil Tələbə Krediti Fondunun 4 illik fəaliyyətinə dair hesabat tədbirində Fondun İdarə Heyətinin sədri Bəhruz Əzimov media nümayəndələrinin suallarını cavablandırarkən bildirib.

Sədr qeyd edib ki, sosial kredit üzrə müraciətlər elektron sistem vasitəsilə yoxlanılır və tələbənin qanunvericiliklə müəyyən edilmiş sosial status meyarlarına uyğunluğu əsas götürülür. Həmin meyarlar təmin olunmadıqda, sosial kredit üzrə müraciət rədd edilir:

“Standart kreditdə isə qərar yalnız tələbənin təhsil göstəriciləri əsasında verilir. Belə ki, tələbə ikinci və sonrakı semestrlərdə 71 baldan aşağı akademik göstəriciyə malik olduqda, standart kredit üzrə müraciətinə imtina verilir. Hər iki kredit növündə tələbənin fənn üzrə kəsrinin olması da imtina qərarına səbəb olur”.

B.Əzimovun sözlərinə görə, təqdim olunan təhsil kreditləri zamin və girov olmadan verildiyi üçün valideynlərin kredit üzrə məsuliyyəti yoxdur və bu gecikmələr onların gələcəkdə kredit götürmək imkanlarına təsir etmir. Kreditin geri qaytarılmasına görə isə yalnız tələbə cavabdehdir.