Meymunçiçəyinin yayılmasına qarşı tədbirlər gücləndirildi | Müzakirə olunan məsələlər açıqlandı

Azərbaycanda “Meymunçiçəyi” virusunun yayılmasına qarşı tədbirlər müzakirə olunub.

Belə ki, Prezident Administrasiyasının tapşırığına əsasən, Səhiyyə Nazirliyində Rəqəmsal İnkişaf və Nəqliyyat Nazirliyi, Dövlət Sərhəd Xidməti, Dövlət Gömrük Komitəsi, İcbari Tibbi Sığorta üzrə Dövlət Agentliyi, Tibbi Ərazi Bölmələrini İdarəetmə Birliyi, “Azərbaycan Hava Yolları” Qapalı Səhmdar Cəmiyyəti və Bakı Beynəlxalq Dəniz Ticarət Limanının səlahiyyətli nümayəndələrinin iştirakı ilə görüş keçirilib.

Səhiyyə Nazirliyindən verilən məlumata görə, görüşdə bu ilin noyabrında COP29 beynəlxalq tədbirinin Azərbaycanda keçirilməsi ilə əlaqədar aidiyyəti qurumların birgə koordinasiyalı fəaliyyətinin təşkili üçün hazırlanan tədbirlər planı müzakirə olunub.

Hazırda bir çox ölkələrdə “Meymunçiçəyi” virusunun sürətlə yayılması hallarını nəzərə alaraq, ölkə ərazisində profilaktik tədbirlərin həyata keçirilməsinin zəruriliyi vurğulanıb. Yekunda rəy və təkliflər dinlənilərək görüləcək fəaliyyətlərə dair vahid yanaşma müəyyənləşdirilib.