Mikoyanla birgə Bakıya gələn, Beriyanın öldürtdüyü, ÇEKA-nın ilk rəhbəri Baba Əliyev | ARAŞDIRMA

Baba Əliyoldaş oğlu Əliyev 1877-ci ildə Mərdəkanda kasıb bir ailədə anadan olub.

Cəmi üç il mədrəsədə təhsil aldıqdan sonra Bakının neft mədənlərində çalışmağa başlayıb.

Baba Əliyevin sol əli altıbarmaqlı olduğundan onun ləqəbi “Altıbarmaq Baba” idi. Kənd əhalisi arasında onun bir vaxtlar qoçuluq etdiyi barəsində söhbətlər var. Ona verilən “Altıbarmaq” ləqəbinin məhz bu dövrdən qaldığı deyilir.

Yazıçı Manaf Süleymanov “Son bahara çatdıq” əsərində onun haqqında yazırdı:

“Azərbaycanda ÇEKA-nın ilk sədri “Altıbarmaq Baba” təyin edilmişdi. Vur-tut, üç-dörd illik təhsili var idi. Rəhmsiz olduğunu çoxları bilirdi. Azarkeş qumarbaz idi...”

Baba Əliyev 1918-ci ildə Azərbaycanda sovet hakimiyyətinin qurulması üçün mübarizəyə qoşulur və digər azərbaycanlı bolşeviklərlə Həştərxana gedir. Burada “Hümmət” təşkilatının yerli bürosuna sədr seçilir.

1920-ci ilin aprelində Anastas Mikoyanla birlikdə XI ordunun önündə Bakıya gələn B.Əliyev Bakıda bolşeviklərin hakimiyyətinin möhkəmlənməsinə yaxından köməklik edir. Məhz buna görə də hökumət onu 1920-ci ilin iyun ayında Azərbaycan SSR Fövqəladə Komissiyasının sədri təyin edir.

1920-ci ilin 15 oktyabrında B.Əliyev sədr vəzifəsindən azad edilərək birinci müavin vəzifəsinə təyin edilir.

1937-ci ildə həbs edilənə kimi o, müxtəlif illərdə İnqilab Tribunasının sədri, Yol-İnşaat Komitəsinin və Azərbaycan Aypara Cəmiyyəti Mərkəzi Komitəsinin sədri vəzifələrində işləyib. Baba Əliyevin ölümü haqqında hələ də müxtəlif versiyalar səslənir. Onun ölümündə Mircəfər Bağırovun və Beriyanın əlinin olması da səslənən versiyalar arasındadır.