Misir Mərdanov DİM sədrinin qalmaqallı açıqlamasına belə reaksiya verdi

“Abituriyentlərin bir qismi imtahan verib. Mərhələli şəkildə digər abituriyentlərin də imtahanı olacaq. Onlara səbirli olmağı arzu edirəm. Tələsməsinlər, vaxtlarından səmərəli istifadə etsinlər, yaxşı bal toplayıb arzuladıqları ali təhsil ocaqlarına daxil olsunlar”.

Bu sözləri “Teleqraf”a Riyaziyyat və Mexanika İnstitutunun direktoru, Azərbaycan Milli Elmlər Akademiyasının müxbir üzvü, professor Misir Mərdanov deyib.

Akademik ölkədə təhsillə bağlı ikili strukturun olmasından danışıb:

“Bəzən Elm və Təhsil Nazirliyi ilə yanaşı, Dövlət İmtahan Mərkəzinin, yəni ikili strukturun olması çətinliklər yaradır. Amma yaxın zamanlarda bu iki strukturun birləşdirilməsi ehtimalını görmürəm. Sadəcə, hər iki məsələdə camaatın, millətin, imtahan verənlərin xeyrinə bəzi məsələləri təkmilləşdirmək olar. Hər halda çalışmalıyıq ki, imtahan verənlərimizin uğuruna sevinək, onları çox əzməyək”.

Misir Mərdanov Dövlət İmtahan Mərkəzinin (DİM) sədri Məleykə Abbaszadənin təhsil ekspertləri ilə bağlı mövqeyinə də münasibət bildirib:

“Yaxşı olardı ki, bu mövzuya onların özləri cavab versinlər. Kim özünü təhsil eksperti hesab edirsə, onlar da buna cavab verməlidirlər”.

Qeyd edək ki, Dövlət İmtahan Mərkəzinin (DİM) sədri Məleykə Abbaszadə təhsil ekspertlərini ictimai fikir formalaşdırmaqda, yazdıqları status və paylaşımlarla özlərini reklam etməkdə, məşhurlaşaraq pul qazanmaqda ittiham etmişdi.