Moskvaya qaçan cinayətkar tutuldu

2022-ci il noyabrın 16-da 24 il əvvəl qətl törədən şəxsə hökm oxunub.

1998-ci il aprelin 22-də Bakı Balıq Hisləmə zavodunda mühafizəçi işləyən Elnur Abbasov ümumilikdə 21 bıçaq zərbəsi vuraraq, usta Mübariz Rəsulovu qətlə yetirib. Daha sonra cinayəti gizlətməkdən ötrü torbaya yerləşdirdiyi meyiti sexdəki soyuducuya qoyub. Ölkə ərazisini tərk etdiyi üçün onun barəsində axtarış elan edilib.

Keçmiş istintaq sənədinə əsasən, hadisə yerində soyuducuda ayaqları qapı tərəfə, başı əks istiqamətdə, qara rəngli polietilen torbada kişi meyiti aşkar edilib. Cəsəd donub torbaya yapışdığı üçün torbanın üst hissəsi kəsilib. Meyitə baxış zamanı məlum olub ki, qətlə yetirilən şəxs Mübariz Rəsulovdur.

Bakı Ağır Cinayətlər Məhkəməsinin hökmü ilə cəzasını ciddi rejimli cəzaçəkmə müəssisəsində çəkməklə Elnur Abbasov 13 il müddətinə azadlıqdan məhrum olunub.