Müəllimlər bu qaydalara riayət etməlidir | Nazirlikdən qərar

Təhsilverənlərin etik davranış qaydaları təsdiqlənib.

Elm və Təhsil Nazirliyinin Kollegiyasının qəbul etdiyi qərara əsasən, müəllimlərin şəxsi sosial media hesablarında onun və işlədiyi müəssisənin adına xələl gətirən, nüfuzunu aşağı salan audio və videomateriallar, təsvirlər paylaşmaq qadağan edilib.

Təhsilverən ictimai davranış normalarına riayət etməli, cəmiyyətin və ayrı-ayrı fərdlərin hüquqlarının pozulmasına gətirib çıxaran əməllərdən çəkinməli, təbiətin, tarixin və mədəni irsin qorunmasına həssas yanaşmalıdır.

Bundan əlavə, müəllimlərə xidməti vəzifələrini icra edərkən təhsil müəssisəsinin ərazisində siqaret çəkmək də qadağan edilib. Onlar icra və əmək intizamına riayət etməli, üzrsüz səbəbdən işdən yayınmamalıdırlar. Dövlət əmlakından şəxsi maraqlar üçün istifadə etməməlidirlər.

Təhsilverən birbaşa və yuxarı rəhbərinin qanunvericiliyə uyğun olan, səlahiyyətləri daxilində qəbul etdiyi əmr və ya tapşırıqları yerinə yetirməyə borcludur.

Müəssisə rəhbərinin qanuni göstərişlərinin yerinə yetirilməməsi intizam məsuliyyətinə səbəb olur. Təhsilverən korrupsiyaya imkan verməməli, şagirdləri korrupsiyaya qarşı barışmazlıq ruhunda yetişdirməlidir.

Müəllim vəzifəsinin qərəzsiz icrası ilə bağlı məsələlərdə ona təsir etmək cəhdlərinin qarşısını qətiyyətlə almalı, heç kimdən hər hansı formada hədiyyə, bəxşiş, ödəniş və s. tələb və ya qəbul etməməlidir.

“Bu qayda qonaqpərvərliklə bağlı və dəyəri “Korrupsiyaya qarşı mübarizə haqqında” qanunda nəzərdə tutulmuş məbləğdən yuxarı olmayan hədiyyələrin təqdim olunduğu hallara şamil edilmir. Qaydalar bütün növ təhsil müəssisələrində çalışan təhsilverənlərə şamil edilir.

Hər bir təhsilverən öz fəaliyyətində qanunun aliliyini, insan hüquqlarını, demokratik prinsipləri rəhbər tutaraq bu qaydaların müddəalarına əməl etməyə borcludur”, – deyə Elm və Təhsil Nazirliyinin Kollegiyasının qəbul etdiyi qərarda bildirilib.