Müştəri "gəzən reklam"a dönür? - "Nə deyirlərsə, onu edirik, turist görəndə deyir ki..." - Baku TV

Mağazadan məhsul alan istehlakçıya üzərində brend loqosu olan polietilen torba təklif edilir və bunun üçün ayrıca ödəniş alınır.

Bəs həmin torbalarla küçədə, metroda və digər ictimai məkanlarda hərəkət edən alıcı faktiki olaraq mağazanın reklamını etmiş olurmu?

Marketoloq Laura Seyidbəyovanın sözlərinə görə, üzərində loqo olan paket marketinq baxımından təkcə qablaşdırma vasitəsi deyil, həm də brend kommunikasiyasının elementidir. İstehlakçı həmin torba ilə ictimai məkanlarda hərəkət etdikcə mağazanın adı daha çox insanın diqqətinə çatır və bu, brend tanınırlığının artmasına töhfə verir.

Bununla belə, marketoloq vurğulayır ki, alıcı reklam xidməti göstərmir və mağaza ilə bu barədə hər hansı razılaşması yoxdur. Reklam effekti yalnız məhsulun loqolu qablaşdırmada daşınmasının əlavə nəticəsi kimi yaranır. Bu səbəbdən istehlakçının funksional olaraq mobil reklam daşıyıcısına çevrildiyini demək mümkün olsa da, bu, məcburi deyil, könüllü baş verən prosesdir.

Məsələ ilə bağlı Antiinhisar və İstehlak Bazarına Nəzarət Dövlət Agentliyindən bildirilib ki, Nazirlər Kabinetinin müvafiq Qərarı ilə təsdiq edilmiş Qaydalara əsasən, ticarət, ictimai iaşə, məişət və digər növ xidmətlərin göstərilməsi, eləcə də işlərin görülməsi zamanı istehlakçılar tərəfindən malların daşınması üçün nəzərdə tutulan qalınlığı 15-50 mikron olan, qulplu və qulpsuz, yüngülçəkili polietilen torbalar istehlakçılara ayrıca məhsul növü kimi təqdim edilməlidir və satış qiyməti barədə istehlakçıya əvvəlcədən məlumat verilməlidir.

Qurumun açıqlamasına görə, Azərbaycanda fəaliyyət göstərən istənilən sahibkarlıq subyekti mövcud qanunvericiliyin tələblərinə əməl etməklə öz adından istifadə edərək polietilen torbalarda reklam yerləşdirə bilər. İstehlakçı isə polietilen torbalardan istifadə edib-etməməkdə sərbəstdir.

Agentlikdən əlavə edilib ki, "Əmtəə nişanları və coğrafi göstəricilər haqqında" Qanuna əsasən, əmtəə nişanının qüvvədə olduğu müddətdə nişan sahibinin ölkə ərazisində onun barəsində sərəncam verməyə və ondan istifadə etməyə müstəsna hüququ var.