Nadir flora və fauna növləri yeni ərazilərdə qorunacaq

“Qırmızı Kitab”ın III nəşrinin daha bir özəlliyi flora və fauna növlərinin ilk dəfə olaraq çəhrayı siyahının tərtib edilməsidir. Əvvəlki iki nəşrdən fərqli olaraq bu nəşrdə nadir və nəsli kəsilmək təhlükəsi altında olan növlərin sayının artması özünü büruzə verib.

Bu barədə ekologiya və təbii sərvətlər naziri Muxtar Babayev ümummilli lider Heydər Əliyevin 100 illik yubileyinə həsr edilmiş Bioloji müxtəlifliyin qorunması mövzusunda keçirilən konfrans və “Qırmızı Kitab”ın III nəşrinin təqdimatında məlumat verib.

Muxtar Babayev bildirib ki, “Qırmızı Kitab”ın III nəşri digər iki nəşrdən fərqli olaraq növlərin beynəlxalq kateqoriyaya uyğun qiymətləndirilməsi IUCN-in (Beynəlxalq Təbiəti Mühafizə İttifaqı 2001) yeni təlimatı əsasında aparılıb.

“30 illik uzun müddətli fasilədən sonra işğaldan azad edilmiş ərazilərimizdə – Qarabağ və Şərqi Zəngəzur iqtisadi rayonları üzrə nadir bitki və heyvan növləri tədqiq olunub. Növlərin, xüsusilə də flora növlərinin qorunma altına alınması üçün xüsusi mühafizə olunan təbiət ərazilərindən kənarda qalan bitki növlərinin mühafizə olunması üçün mikrorezervatların yaradılması ilə həmin növlərin yayıldığı ərazilərin kənar təsirlərdən mühafizə olunması üçün tədbirlər görülür. Artıq Abşeron yarımadasında müxtəlif ərazilərdə – İlxıdağ, Beşbarmaq dağı, Səngəçal və Pirəkəşkül qəsəbələri ərazisində 5 belə ərazi seçilib və FAO ilə birlikdə həmin ərazilərdə yayılmış növlərin mühafizəsinin təşkil olunması növbəti mərhələlərdə təmin olunacaq”, – deyə o qeyd edib.