Naxçıvanda duz istehsalı niyə dayandırılıb? | Rəsmi açıqlama

Naxçıvan deyiləndə ilk olaraq bu qədim torpağın simvollarından biri sayılan duz yada düşür.

Əsrlər boyu bölgənin ən tanınan nemətlərindən olan Naxçıvan duzu həm keyfiyyəti, həm də təbii tərkibi ilə seçilib. Lakin bu gün vəziyyət tam fərqlidir. Naxçıvanda Naxçıvan duzu tapılmır.

Sakinlərin sözlərinə görə, yerli duz artıq bir neçə aydır satışda yoxdur.

“Axırıncı dəfə Naxçıvan duzunu 4-5 ay əvvəl almışdıq. İndi Naxçıvanda Türkiyədən və ya başqa ölkələrdən gətirilən duzlar satılır. Amma onların dadı bizim ağız tamımıza uyğun gəlmir. Naxçıvan duzuna öyrəşmişik, indi bizə çətin olur. Gözümüzü açıb Naxçıvan duzu görmüşük, qıraqdan gələn duzlar bizi qane etmir", – sakinlərdən biri deyib.

Məsələ ilə bağlı Naxçıvan Muxtar Respublikası İqtisadiyyat Nazirliyindən bildirilib ki, duz dağ massivində yerləşən 5 №-li duz mədənində texniki təhlükəsizliyin gücləndirilməsi baxımından müvafiq işlərin görülməsinə zərurət yarandığından, eləcə də gələcəkdə duz istehsalı prosesinin daha yüksək keyfiyyətdə təşkil olunması məqsədilə şaxtadan duzun çıxarılması müvəqqəti olaraq dayandırılıb. Bu səbəbdən hazırda “Naxçıvan Duz İstehsalı” MMC-də istehsal və qablaşdırma prosesi həyata keçirilmir.