Niyə bəziləri ağ-qara, digərləri rəngli yuxu görürlər?

Ağ-qara yuxu görmək hər hansı bir xəstəlik və ya təhlükə siqnalı deyil, tamamilə normal hal hesab olunur.

Bu barədə həkim-psixiatr Anton Şestakov məlumat verib.

"Ümumiyyətlə, yuxuda rəng anlayışı düşündüyümüzdən daha az sabit olan bir detaldır. Gecə saatlarında beyin ənənəvi mənada "kino çəkmir" – o, xatirələrdən və duyğulardan ibarət obrazları bir araya gətirir. Bu zaman rəng tonu əksər hallarda ikinci dərəcəli detal kimi çıxış edir. Məhz bu səbəbdən bir çox insan yuxudan oyandıqdan sonra gördüyü yuxunun rəngli olub-olmadığını xatırlaya bilmir. Bu isə tamamilə normaldır", – deyə mütəxəssis izah edib.

Həkimin sözlərinə görə, reallıqda gördüklərimiz yuxuların rəng palitrasına əhəmiyyətli dərəcədə təsir göstərir. Ağ-qara ekran qarşısında böyüyənlər adətən belə yuxular görürlər. Uşaqlıqdan rəngli təsvirlərlə əhatə olunan şəxslər isə demək olar ki, həmişə rəngli yuxular görürlər. Yəni yuxunun tonu hər hansı bir problemin siqnalından daha çox, bizim vizual təcrübəmizin əksidir.

"Burada önəmli olan rəngin özü deyil, onu əhatə edən amillərdir. Əgər insan yuxularının solğunlaşdığını, bozardığını görürsə və bu, onun real həyatında da sevinc hissinin azalması, hər şeyin maraqsız və darıxdırıcı görünməsi ilə müşayiət olunursa, belə hal artıq psixoloji vəziyyətə diqqət yetirmək üçün əsaslı səbəbdir", – deyə psixiatr qeyd edib.

Yuxu artıq dincəlməyə kömək etmirsə, təkrarlanan ağır yuxular insanı narahat edirsə, səhərlər yorğunluq, gündüzlər isə həftələrlə davam edən depressiv hal müşahidə olunursa, bu artıq narahatlıq doğuran əlamətlərdir. Əgər "rəngsiz" yuxulara bunlardan heç olmasa biri əlavə olunarsa, o zaman psixoterapevt, psixiatr və ya somnoloq kimi mütəxəssislərə müraciət etmək məsləhətdir.