“Niyə məktəbin önündə parkinq olmalıdır ki?!” | Müəllimlər “AzParking”dən şikayətləndi - Baku TV

Nərimanov rayonu, 200 nömrəli məktəb-lisey kompleksinin müəllimləri Baku TV-nin qaynar xəttinə müraciət edərək təhsil ocağının qarşısında yaradılan “AzParking” zonasından narazılıqlarını bildiriblər.

Onların sözlərinə görə, hər gün işə gedib-gəldikləri üçün avtomobillərini məktəbin qarşısında saxlayırlar və bunun müqabilində gündəlik 4-5 manat ödəniş edirlər.

Müəllimlərdən biri bildirib ki, ərazi onların xəbəri olmadan, heç bir elan verilmədən və avtomobillər siyahıya alınmadan “AzParking” zonası elan edilib:

“Dərsdə oturduğumuz yerdə hər gün cərimələr gəlir”.

Başqa bir müəllim isə məsələ ilə bağlı narazılığını belə ifadə edib:

“Həftənin beş günü 40 manat ödəsəm, ayın sonunda bu, kifayət qədər böyük məbləğ edir. “AzParking” əməkdaşlarına şikayət etdikdə isə “ictimai nəqliyyatdan istifadə edin” cavabını alırıq”.