Ölkədə cinsi bəlli olmayan körpə doğulub?

Sosial mediada 4 gün əvvəl özəl klinikaların birində cinsi məlum olmayan körpənin doğulduğuna dair məlumatlar paylaşılıb. Uşağın sidik və idrar yolunun da qapalı olduğu bildirilir. Təcili əməliyyata ehtiyacı olduğundan 30 min manat pul toplanır.

Sözügedən klinikanın uşaq cərrahı Gündüz Ağayev xəbərin əsassız olduğunu vurğulayıb. Bildirib ki, uşağın cinsi qızdır. Sidik və nəcis ifrazı da maneəsizdir. Körpəyə hər hansı cərrahi müdaxilə tövsiyə olunmayıb.

Bu məqamda bir sual yaranır. Tibbdə cinsi olmayan körpənin dünyaya gəlməsi mümkündür?

Pediatr Günay Rəsulova deyir ki, daha yaşlı analardan doğulan uşaqlarda bu hallar baş verə bilər:

“Bu durumda ya hamiləlik dövründə vaxtlı-vaxtında müayinələrə gedilməyib, ya da müayinə zamanı belə bir patologiya gözdən qaçıb. Elə anomaliyalar var ki, onların doğumdan sonra müalicəsi mümkündür. Hər bir halda hamiləlik dövründə diaqnostika olunduqdan sonra proqnoz da bəlli olur. Yəni uşağın taleyinin necə olacağı öncədən bilinir və bu barədə ailəyə bildirilir. Bundan sonra isə seçim ailənin olur”.

Mütəxəssis onu da qeyd edib ki, dünyanın hər yerində körpənin inkişaf anomaliyası ilə doğulma ehtimalı var. Buna görə də hamiləlik dövründə həkim müayinələrinə etinasız yanaşmamaq tövsiyə edilir.