Ölkəmizdə hansı məhsulların qiymətində bahalaşma və ucuzlaşma var? | Siyahı açıqlandı

Cari ilin mart ayında əvvəlki aya nisbətən ayrı-ayrı qida məhsullarından daha çox artım balıq və balıq məhsullarının, süd və süd məhsullarının, süfrə marqarininin, kərə, günəbaxan və qarğıdalı yağlarının, meyvə və tərəvəzlərin, qəhvə, kakao, qazlı və qazsız suların, siqaretin qiymətlərində müşahidə edilib.

Dövlət Statistika Komitəsinin məlumatına görə, ötən ay əvvəlki aya nisbətən ayrı-ayrı qida məhsullarından un, yumurta, göyərti və xiyarın qiymətlərində azalma müşahidə olunub.

Qeyd edilib ki, 2025-ci ilin mart ayında qeyri-qida məhsulları üzrə istehlak qiymətləri indeksi əvvəlki aya nisbətən 100,1 faiz, yanvar-mart aylarında isə əvvəlki ilin müvafiq dövrünə nisbətən 102,7 faiz təşkil edib.

Mart ayında əvvəlki ayla müqayisədə qeyri-qida məhsullarından bahalaşma kərpicin, sementin, ortopedik döşəklərin, mebellərin, zərgərlik məmulatlarının, ucuzlaşma isə məişət cihazlarının, mobil telefonların, televizorların qiymətlərində müşahidə olunub. Digər qeyri-qida məhsullarının qiymətlərində ciddi dəyişiklik baş verməyib.