Ölümdən qurtuldu, bu əmələ görə saxlanıldı | Nicat Lənkəranskidən açıqlama

Bakı Ağır Cinayətlər Məhkəməsində Cinayət Məcəlləsinin 234.4.3-cü (Qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma – külli miqdarda törədildikdə) maddəsi ilə ittiham olunan Nicat Lənkəranski ləqəbi ilə tanınan Nicat Ələkbərovun cinayət işinin növbəti məhkəmə prosesi keçirilib.

Hakim Əli Məmmədovun sədrliyi ilə keçirilən iclas zamanı ittiham olunan şəxsin Baş Mütəşəkkil Cinayətkarlıqla Mübarizə İdarəsi əməkdaşları tərəfindən saxlanılarkən üzərinə baxış zamanı qeydə alınmış videogörüntülər məhkəmə iştirakçılarının nəzərinə çatdırılıb.

Bununla bağlı hakimin suallarını cavablandıran Nicat Ələkbərov heç vaxt narkotik maddədən istifadə etmədiyini bildirərək, axtarış zamanı üzərində aşkarlanan psixotrop maddələri ilk dəfə aldığını deyib.

Qeyd edək ki, Nicat Ələkbərovun zərərçəkmiş qismində olduğu digər cinayət işinin məhkəmə istintaqı hakim Vüqar Quliyevin icraatındadır. Belə ki, martın 10-da Səməd Vurğun küçəsində, Bakı Dövlət Sirkinin yaxınlığında tapançadan atəş açılmaqla sui-qəsd cəhdi edilən Nicat Ələkbərov bir neçə gün sonra Cinayət Məcəlləsinin məlum maddəsi ilə saxlanılıb.