Ombudsmanın Milli Preventiv Qrupu hərəkətə keçdi | Şikayətlər qeydə alındı

Ombudsmanın Milli Preventiv Qrupunun üzvləri tərəfindən Bakıdakı Qanunsuz Miqrantların Saxlanılması Mərkəzinə və Yevlax Rayon Müvəqqəti Yerləşdirmə Mərkəzinə əvvəlcədən xəbərdarlıq etmədən başçəkmələr həyata keçirilib.

Bakıdakı mərkəzə başçəkmə zamanı Ombudsmanın nümayəndələri tərəfindən mərkəzin yaşayış binalarına, tibb məntəqəsinə, yeməkxana və digər obyektlərə baxış keçirilib, mövcud vəziyyət araşdırılıb.

Müəssisədə qəbul edilən şəxslərin bəzilərinin saxlanma şəraiti və onlarla rəftar məsələləri ilə bağlı bir sıra şikayətlər qeydə alınıb, eləcə də tibbi xidmət və dərman preparatları ilə təminatla bağlı problemlərin olduğu da bildirilib.

Eyni zamanda mərkəzdə müvafiq psixoloq ştatının olmasına baxmayaraq, həmin vəzifə üzrə xidmətin təşkil edilmədiyi də müəyyən olunub.

Yevlaxda yerləşən mərkəzdə isə ixtisasca həkim tibb işçisinin olmadığı, keyfiyyətli psixoloji yardım işinin təşkili üçün psixoloq otağının zəruri əyani və didaktik materiallarla təchiz olunmasına ehtiyac olduğu müəyyən edilib.

Qeyd edək ki, başçəkmələrin nəticələri ilə bağlı qurum tərəfindən Dövlət Miqrasiya Xidmətinə müraciət olunacaq.