Oruc tutan insan Allaha necə yaxınlaşır? | Peyğəmbərin Ramazan haqqında dedikləri - AMİN

“Amin” verilişinin yeni buraxılışı yayımlanıb.

Proqramda fəlsəfə elmləri doktoru Könül Bünyadzadə və ilahiyyatçı Mirniyaz Mürsəlov ilə Ramazan ayının fəzilətləri mövzusu müzakirə olunub.

Mirniyaz Mürsəlovun sözlərinə görə, oruc tutan insan nəfsini tərbiyə etməklə Yaradana yaxınlaşmış olur:

“Bəzi insanların orucu sadəcə ac qalmaqdan ibarətdir. İbadət bir təcrübədir, insan onu öz həyatında yaşamalı və hiss etməlidir. İbadətlərin, xüsusilə də namaz və orucun əsas hədəfi insanı günah əməllərdən çəkindirməkdir. Ramazan ayında tutulan oruc insanı günahın kirlərindən təmizləyir”.

Allahın ibadətlərə ehtiyacı olmadığını deyən Könül Bünyadzadə bildirib ki, namaz da, oruc da insanın özünə lazımdır.

“Allah ilə insan arasında heç bir vasitə yoxdur. Oruc insanın ruhunun yüksəlməsidir. Kimsə Tanrı ilə insan arasında vasitəçi olmamalıdır. Allah insana şah damarından daha yaxındır.

Bu həyatda hər kəs öz yükünü daşıyır. Kimsə nəfsini doyuzdurmağa, bəziləri də onu ac qoymağa çalışır. Dünyada yaxşılıq pislikdən daha çoxdur. Allah bu dünyanı sevgi ilə yaradıb, əgər pislik yaxşılığı üstələyərsə, dünya dağılır”, – deyə o əlavə edib.