Palçığın içində necə yaşayaq? | Oğuzdakı sel insanları çarəsiz qoydu

Oğuzda yağan leysan yağışları bir sıra fəsadlar törədib.

Mollalı kəndi yaxınlığından keçən Türyançay çayından gələn sel kənd sakinlərinin şəxsi təsərrüfatlarına ziyan vurub, ev quşlarını sel aparıb. Həyətyanı sahələr, evlərin zirzəmiləri lil qatı ilə örtülüb.

“Su gəldi həyətimizə, elə vəziyyət yarandı ki, qarşısını almaq mümkün olmadı. Hər yeri su basdı, həyətimizi dağıtdı, çolpalarımızı öldürdü”, – kənd sakini deyib.

Mollalı kəndində sel ən çox balıqçılıq təsərrüfatına ziyan vurub. Obyekt sahibinin sözlərinə görə, təsərrüfatda 500 000-dən çox balıq məhv olub:

“Təsərrüfatın sel suları altında qalması nəticəsində 2 milyon manata yaxın ziyan dəyib. Təkcə balığa 750 000 manatdan çox, balıq yeminə isə 350 000 manatdan çox vəsait xərclənmişdi”.

Sahibkara dəymiş ziyanla bağlı Aqrar Sığorta Fondundan bildirilib ki, balıqçılıq təsərrüfatları da sığortalana bilər. Lakin qeyd olunub ki, balıqçılıq təsərrüfatının sığortalanması ilə bağlı onlara təsərrüfat sahibi tərəfindən müraciət olunmayıb.

Mollalı kəndində yaranan fəsadlarla bağlı iyulun 25-dən etibarən rayon və kənd rəhbərliyi tərəfindən kəndin ziyan dəyən ərazilərinə baxış keçirilib. Hazırda ağır texnikalar vasitəsilə Türyançay çayında işlər aparılır.