Peyvəndə görə bağçalara qəbul dayandırılıb?

Son zamanlar qızılca virusunun sürətlə yayılması səbəbindən bağçalarda uşaqların qızılcaya qarşı peyvənd olunması ilə bağlı arayış tələb edildiyi iddia olunur.

Həmçinin o da bildirilir ki, peyvənd olunmayan uşaqların, ümumiyyətlə, bağçalara qəbulu dayandırılıb.

Məsələ ilə bağlı Məktəbəqədər və Ümumi Təhsil üzrə Dövlət Agentliyindən bildirilib ki, Nazirlər Kabinetinin Məktəbəqədər təhsil müəssisəsinin Nümunəvi Nizamnaməsi haqqında qərarına əsasən, uşaqların məktəbəqədər təhsil müəssisələrinə qəbulu prosesində bir neçə sənəd tələb edilir:

“Bura müəssisənin müdirinin adına ərizə, valideynin (qanuni nümayəndənin) şəxsiyyətini təsdiq edən sənədin surəti, uşaqların mübadilə vərəqəsi, uşağın doğum haqqında şəhadətnaməsinin surəti, uşağın 3x4 ölçüdə 2 ədəd fotoşəkli, sağlamlığının vəziyyəti barədə arayış daxildir.

Mübadilə vərəqəsi uşağın doğuşdan etibarən keçirdiyi xəstəliklər və vurulmuş peyvəndlər haqqında məlumatları özündə əks etdirən sənəddir. Mübadilə vərəqəsi də daxil olmaqla qeyd olunan sənədlərdən hər hansı biri olmadıqda uşağın bağçaya qəbulu prosesi mümkün deyil”.

Qeyd edək ki, yerli mətbuatda yayılan xəbərlərə əsasən, indiyədək 20-yə yaxın şəxs qızılcadan dünyasını dəyişib. Ölənlərin çox hissəsini uşaqlar təşkil edir.