Protein tozlarının zərərləri üzə çıxdı | Bu nüanslara mütləq diqqət edin, yoxsa...

Son illərdə gənclər arasında protein tozundan istifadə sürətlə artıb.

Bədən quruluşunu inkişaf etdirmək və əzələ kütləsini artırmaq məqsədilə istifadə edilən protein tozları əslində yanlış istifadə hallarında ciddi sağlamlıq problemlərinə səbəb ola bilər.

Qastroenterologiya üzrə mütəxəssis professor Vedat Göral protein tozlarının zərərli tərkib hissələrinin qaraciyər funksiyasını pozaraq qaraciyər çatışmazlığı, siroz və hətta qaraciyər transplantasiyasına qədər ciddi problemlərə səbəb ola biləcəyini deyib.

Bu tozlar daha fit bədən təqdim etsə də, həmişə zərərsiz olmur. Doktor xüsusilə alkoqolla birlikdə istifadə olunan protein tozlarının daha təhlükəli olduğunu bildirib. Bu məhsullar yalnız qaraciyəri deyil, həmçinin böyrək funksiyalarını da poza bilər. Bəzən bu tip əlavələr ürək problemlərinə və hətta ölüm hallarına gətirib çıxarır.

Protein tozlarının uzun müddət və yüksək dozada istifadəsi təhlükəlidir. Mütəxəssis bu cür məhsulları yalnız həkim məsləhəti ilə və düzgün dozada istifadə etməyin vacib olduğunu vurğulayıb.

Həkim bildirib ki, protein tozunun əvəzinə yumurta, balıq, ət və pendirdən istifadə etmək daha məqsədəuyğundur.