Psixoloqdan uşaqlıq travmalarının iş aludəçiliyinə təsiri barədə açıqlama

Millennial nəsli tez-tez “iş aludəçisi” kimi xarakterizə olunur. Mütəxəssislər isə bunun arxasında zənginlik arzusu deyil, gələcək maddi çətinliklərdən qorxu dayandığını bildirirlər.

Rusiyalı psixoloq Natalya Naumovanın sözlərinə görə, bu yanaşmanın kökləri çox vaxt uşaqlıq dövrünə gedib çıxır.

Bir çox millennial maliyyə böhranları fonunda böyüyüb, valideynlərinin çətinliklərini görüb və bu təcrübə onlarda davamlı narahatlıq formalaşdırıb. Nəticədə dünya qeyri-sabit məkan kimi qəbul edilir və insanlar hər an hər şeyin dəyişə biləcəyini düşünür.

Mütəxəssis qeyd edir ki, bu qorxu bəzilərini daha çox işləməyə, pul xərcləməkdən çəkinməyə və özlərini işə həddindən artıq həsr etməyə sövq edir. Halbuki, maliyyə ehtiyatı yaratmaq təhlükəsizlik hissini artırsa da, problemi tam həll etmir.

Psixoloq vurğulayır ki, əsas çıxış yolu travmatik təcrübələri anlamaq və işlə şəxsi həyat arasında balans qurmaqdır. Əks halda, fasiləsiz işləmək insanın həm sağlamlığına, həm də sosial münasibətlərinə mənfi təsir göstərə bilər.