“Qadağa qoyublar, torpağıma girə bilmirəm” | Bakının bu ərazisində nə baş verir? - Baku TV

Birinci Qarabağ müharibəsinin iştirakçısı olan bir neçə şəxsə 2001-ci ildə Bakı Şəhər İcra Hakimiyyəti tərəfindən paytaxtın Sabunçu rayonu, Maştağa qəsəbəsinin Ləhiş bağları adlanan ərazisində təxminən 1 hektara yaxın torpaq sahəsi verilib.

Lakin həmin şəxslər 24 il ərzində burada nə abadlıq işləri görə, nə də əraziyə daxil ola biliblər. Onların sözlərinə görə, buna səbəb yerli sakinlərdən birinin onlara mane olmasıdır.

“Bu torpaqlar müharibə veteranı olduğumuz üçün Bakı Şəhər İcra Hakimiyyətinin Bağlar Təsərrüfatı İdarəsi tərəfindən müqavilə əsasında bizə bağ təsərrüfatı kimi verilmişdi. 2001-ci ildən bu günə qədər dəfələrlə burada abadlıq işləri aparmaq istəmişik, lakin yerli sakin Dilşad Paşayeva bunun dədə-baba torpaqları olduğunu bildirərək bizə icazə verməyib. O vaxtdan bəri dəfələrlə mübarizə aparmışıq, amma nəticə olmayıb. Keçən il isə oğlu ilə birlikdə əlində balta dayanıb, “özünü yaxşı apar, buradan çıx get” deyə hədə-qorxu gəldi”, – şikayətçi Araz Allahverdiyev bildirib.

Dilşad Paşayeva isə ittihamlara belə cavab verib: “Onlara qarşı cinayət işi açılıb və sənədlərinin saxta olduğu təsdiq edilib. Bu torpaqlar mənim dədə-baba torpaqlarımdır”.

Mövzu ilə bağlı sözügedən ərazinin aid olduğu Bakı şəhəri, Sabunçu rayonu, Maştağa bələdiyyəsindən isə bildirib ki, məsələnin onlara hər hansı bir aidiyyəti yoxdur.