Qalıqları tapılan hərbçi Firdovsinin atası danışdı | Vida mərasimindən görüntülər

Laçında 2 il əvvəl itkin düşərək həlak olan Azərbaycan Ordusunun əsgəri Firdovsi Abdullayevlə Gəncədə vida mərasimi keçirilib.

Mərasim onun ailəsinin yaşadığı Məhsəti qəsəbəsində baş tutub. Dəfn mərasimində F.Abdullayevin ailə üzvləri, rəsmi şəxslər, hərbçilər və ictimaiyyət nümayəndələri iştirak ediblər.

Daha sonra F.Abdullayevin nəşinin qalıqları Gəncə şəhərinin Şəhidlər xiyabanında dəfn edilib.

Qeyd edək ki, 2003-cü il təvəllüdlü F.Abdullayev Goranboyun Qaradağlı Kəndində anadan olub. Hazırda ailəsi Gəncə şəhərində yaşayır.

Xatırladaq ki, 2022-ci il martın 3-də Azərbaycan Ordusunun əsgərləri Fərid Məmmədov və Firdovsi Abdullayev Laçında çətin relyefli ərazidə çovğun səbəbindən istiqaməti itirərək itkin düşüb, uzun müddət soyuq temperaturda qaldıqları üçün donvurma səbəbindən ölüblər. Onların meyitlərinin qalıqları 2024-cü il iyulun 3-də Kəlbəcərin İstisu qəsəbəsindəki Yüzbulaq yaylağının ərazisində aşkarlanaraq götürülüb.