Qanunlara önəmli əlavələr olunur | Bu yoldan istifadə edən sürücülər diqqətli olun!

Ödənişli avtomagistrallardan istifadə qaydalarının pozulmasına görə yeni cərimələr tətbiq ediləcək.

Bu, Milli Məclisin dekabrın 10-da keçirilən iclasında müzakirəyə çıxarılan İnzibati Xətalar Məcəlləsinə təklif edilən əlavədə əksini tapıb.

Layihəyə əsasən, ödəniş məntəqələrindən keçmədən kənar yollardan istifadə etməklə, habelə ödənişsiz gediş hüququna malik istifadəçilər üçün müəyyən edilmiş xidməti keçid zolağından belə hüququ olmayan istifadəçilər tərəfindən ödənişli avtomagistrallara daxil olmağa və ya oradan çıxmağa görə 150 manat məbləğində cərimə nəzərdə tutulur.

Buraxılış məntəqələrinin normal işinə mane olmağa, o cümlədən buraxılış məntəqələrində nəqliyyat vasitələrinin keçidini bağlamağa, gediş üçün maneəni – şlaqbaumu özbaşına götürməyə görə 200 manat məbləğində cərimə tətbiq ediləcək.

Milli Məclisin iclasında müzakirəyə çıxarılan Cinayət Məcəlləsinə təklif edilən yeni əlavəyə əsasən, təhlükəli qida məhsullarını istehsal edənlər, satışını təşkil edənlər və ya satış məqsədilə saxlayanlar 10 ilədək müddətə azadlıqdan məhrum ediləcək.

Bununla yanaşı, istehlakçıları aldatma və ya pis keyfiyyətli məhsul istehsal etmə və satma ilə əlaqədar “Xeyli miqdar” və “külli miqdar” çərçivəsində nəzərdə tutulan məbləğlər dəyişir, artıq istehlakçıları 5 min manatdan yuxarı aldatma cinayət məsuliyyəti yaradacaq.

Aptekdəki dərmanlar və onların qiymətləri barədə istehlakçıya məlumat verməyən satıcılar 200 manatadək cərimələnəcək. Reyestrə daxil edilməyən dərmanların reseptə yazılmasına görə də cərimə tətbiq olunacaq.

Bununla yanaşı, tibb müəssisələri üçün qablaşdırılmış dərmanların pərakəndə satışına görə 9000 manatadək cərimə nəzərdə tutulur.