Qarabağ zəfərinə gedən yolun təməlləri | 6 il öncə başlayan döyüşlər zəfərin müjdəçisi oldu

İyulun 12-dən başlayan, 44 günlük Vətən müharibəsinin başlanğıcı hesab olunan və Azərbaycan Ordusunun qələbəsi ilə yekunlaşan Tovuz döyüşlərindən 6 il ötür.

2020-ci il iyulun 12-si günorta saatlarından etibarən Ermənistan Silahlı Qüvvələri atəşkəsi kobud şəkildə pozaraq Dövlət Sərhəd Xidmətinin Tovuz rayonunda yerləşən mövqelərini artilleriya qurğularından atəşə tutub.

Döyüşlər zamanı hücum cəhdinin qarşısı alınıb, düşmənə sarsıdıcı zərbələr endirilib. Ordumuzun göstərdiyi cavab tədbirləri nəticəsində böyük itki verən düşmən geri çəkilməyə məcbur edilib. Düşmənin 100-dən çox canlı qüvvəsi, xeyli sayda hərbi texnikası və mühüm obyektləri məhv edilib.

Döyüşlərdə general-mayor Polad Həşimov, polkovnik İlqar Mirzəyev və daha 10 hərbçimiz qəhrəmancasına şəhid olub. Ermənilərin atdığı mərminin evlərdən birinə düşməsi zamanı mülki şəxs, 76 yaşlı Əziz Əzizov da şəhid olub.

Düşmənin artilleriya və minaatan zərbələri nəticəsində Tovuzun Ermənistanla sərhəddə yerləşən bir neçə kəndində evlərə, inzibati binalara, mülki obyektlərə və məktəblərə ciddi ziyan dəyib.

Bununla yanaşı, Ordumuzun qələbəsi ilə yekunlaşan Tovuz döyüşləri Azərbaycanın uzun illər işğal altında olan torpaqlarının azad olunmasına yol açıb.

2020-ci il sentyabrın 27-dən etibarən Azərbaycan Ordusu tərəfindən düşmənin təxribatlarına qarşı əks-hücum əməliyyatları başlayıb. 44 gün davam edən Vətən müharibəsi nəticəsində 30 ilə yaxın işğal altında olan torpaqlarımız azad olunub.