Qarğalar bu hərəkəti 17 il unutmur

Qarğalar onları qəzəbləndirən və ya təhdid edənlərə qarşı 17 ilə qədər kin saxlaya bilirlər.

Vaşinqton Universitetinin ətraf mühit üzrə alimi Con Marzlaff bunu necə öyrəndiyini izah edib.

Qarğaların ən ağıllı quşlardan olduğu məlumdur. Sən demə, onlar simaları da unutmur. Bu iddiaları edən alimin araşdırmaları 2006-cı ildə başlayıb. Alim qorxulu maska taxıb və tor vasitəsilə yeddi qarğa tutub. Onları sağ-salamat buraxmazdan əvvəl o, quşların ayaqlarına tanınma halqaları bağlayıb.

Sonrakı illərdə o və köməkçiləri Vaşinqton Universitetinin şəhərciyində yerli qarğaları qidalandıranda və onların reaksiyalarını qeyd edərkən vaxtaşırı maskadan istifadə ediblər. Nəticədə rastlaşdığı 53 qarğadan 47-nin aqressiv rekasiyasına məruz qalıb.

2023-cü ildə davam edən araşdırma çərçivəsində tədqiqat qrupunun üzvləri qarğalara zərər vermədən qidalandırmaq üçün “neytral” maskadan da istifadə ediblər. Qarğalar bu maskanı taxan insanlara o qədər də aqressiv reaksiya verməyiblər.

Təcrübənin başqa bir hissəsində tələbələr Sietl bölgəsində qarğaları tutarkən fərqli maskalardan istifadə olunub. Daha sonra qarğaların hansını “təhlükəli”, hansını isə “neytral” hesab etdiklərini bilmədən könüllülərdən maska taxmaları istənilib. “Təhlükəli” maska taxan bir könüllü deyib ki, quşlar onu görüb əsəbiləşiblər.

Sonda qeyd edək ki, qarğalar alətlər hazırlamağı və hətta dördə qədər saymağı bacarırlar.