Qayınatama dözə bilmirdim | 16 yaşında evlənən şəkili xanım - O VAXTLAR

“O vaxtlar” verilişinin yeni buraxılışı yayımlanıb.

Proqramın budəfəki qəhrəmanı şəkili Şəfa Rəhimova olub.

Qohumu ilə evləndiyini deyən Ş.Rəhimova bildirib ki, bu, Şəkidə ənənə olub və indi də davam edir:

“Bizdə hamı qohumu ilə ailə qurub. Mən xalam oğlu ilə evlənmişəm. Xalam çox gözəl qayınana olub. Məni birinci kursda nişanladılar, 16 yaşında ərə getdim. Həyat yoldaşımın həm yaxşı, həm də pis tərəfləri var idi. Mühəndis işləyirdi, mədəni adam idi. O vaxtın kürəkənləri də hörmətcil idilər. İndi belə şey yoxdur. Yoldaşım hər şeyə görə “anamdan ayıbdır” deyir, arada hörmət saxlayırdı”.

Ailə həyatındakı çətinliklərdən bəhs edən Ş.Rəhimova zamanında yaşadığı problemlərə görə həyat yoldaşından ayrılmaq da istəyib.

“48 il yoldaşımla ailə olmuşuq. Birdən elə xasiyyəti üzə çıxırdı ki, deyirdim, səndə bu da var?! İndi ərə gedirlər ki, uşaq olsun, boşansınlar, kişi aliment versin. Mən buna mənasız həyat deyirəm. Dünyada ər çörəyindən şirin çörək tanımıram. Özüm neçə yerdə işləmişəm, amma yoldaşımın gətirdikləri daha dadlı gəlirdi.

O vaxtlar ailəyə müdaxilələr olmurdu. Bir dəfə hirslənmişdim, boşanmaq istəyirdim. Valideynlərim dedilər ki, bu, ailədir, dözməlisən. Qayınatam yaman olub, bəzi hərəkətləri olurdu ki, dözə bilmirdim. İndi düşünürəm, nə yaxşı ki, valideynlərim elə deyiblər”, – deyə o, sözlərinə əlavə edib.