Qazi sevdiyi qızı necə qaçırdı? | "Telefonumu aldılar, ağlıma da gəlməzdi ki..." - ARZUNUN VAXTI

“Arzunun vaxtı” verilişinin növbəti buraxılışında aparıcı və müəllif Arzu Kəlbi Həbib Namazov və Aytac Namazova cütlüyünün evində olub.

44 günlük Vətən müharibəsində iştirak edən qazi Həbib Namazov yoldaşı ilə tanışlıq hekayələrindən söz açıb.

“Aytacla tanışlığımız gözlənilmədən oldu. Əlil arabasında olduğum üçün özümə qapanmışdım və kiminsə məni bu şəkildə qəbul edəcəyinə inanmırdım. Amma Aytacı tanıdıqca başa düşdüm ki, o məni heç vaxt tərk etməz. Ailəsi əvvəlcə izdivacımıza razı deyildi. Buna görə də Tovuza gedib Aytacı qaçırdım. Zamanla valideynləri də bizi qəbul etdilər, hazırda onlarla münasibətimiz çox yaxşıdır”, – deyə o bildirib.

Aytac Namazova isə həyat yoldaşına olan münasibətindən və keçdikləri çətin dövrdən bəhs edib:

“Müharibə iştirakçısı ilə evlənəcəyim heç ağlımdan keçməzdi. Bir ad günü məclisində tanış olduq və bir-birimizi tanıdıqca Həbibin niyyətinin ciddi olduğunu gördüm. Məni qaçıranda çox həyəcanlı idim. Qaçandan sonra ailəmə zəng edib bu xəbəri verdim. İndi çox xoşbəxtik”.