Qəbələdə polislə azyaşlı arasında baş verən hadisənin əsl səbəbi

Qəbələdə polisə qarşı müqavimət göstərən şəxsin həbsi, o cümlədən yeniyetməyə zor tətbiq edən polisin daxili işlər orqanlarından xaric edilməsi ilə bağlı insidentin bəzi təfərrüatı ortaya çıxıb.

Yerli mediaya daxil olan məlumatlarda bildirilir ki, daxili işlər orqanlarından xaric edilən şəxs Qəbələ Rayon Polis Şöbəsinin Post Patrul Xidmətinin əməkdaşı polis serjantı Cavid Abbasovdur.

Bildirilib ki, hadisə baş verən gün – dekabrın 2-də Vəndam qəsəbəsində yerləşən restoranlardan birində 12 yaşlı uşağın doğum günü qeyd olunurmuş. Orada səs-küy olması səbəbindən əraziyə PPX əməkdaşları gəlib və tədbirin daha sakit keçirilməsini tələb ediblər. Bu isə məclis sahiblərinin narazılığına səbəb olub və ad günü olan uşağın atası Səxavət Ağayev və əmisi Eldəniz Ağayevlə polis əməkdaşları arasında mübahisə yaranıb.

Polis Səxavət və Eldəniz Ağayevləri polis şöbəsinə aparmaq üçün PPX avtomobilinə otuzdurub. Bu zaman 12 yaşlı uşaq polis əməkdaşını ağır sözlərlə təhqir edərək onlara daş atıb. Polis serjantı Cavid Abbasov isə əsəblərinə hakim ola bilməyib və vəzifə səlahiyyətlərini aşaraq yetkinlik yaşına çatmayan şəxsi yerə yıxaraq döyüb. Baş verən insidentlə bağlı sosial şəbəkələrdə görüntülər də yayılıb.

Qeyd edək ki, Daxili İşlər Naziriliyinin mətbuat xidmətinin yaydığı məlumata görə, fakta görə cinayət işi qaldırılıb və 2 nəfər – Səxavət və Eldəniz Ağayevlər həbs edilib. Eyni zamanda, yetkinlik yaşına çatmayan şəxsə qarşı səlahiyyət həddini aşan polis əməkdaşı barəsində xidməti yoxlama aparılıb və o, daxili işlər orqanlarından xaric edilib.