Qeydə alınan bütün cinayətlər… | Hərbi Prokurorluqdan vacib açıqlama

“Səmərəli fəaliyyət nəticəsində 2025-ci ilin yanvar ayında Hərbi Prokurorluqda qeydə alınmış cinayətlər 100 faiz açılıb”.

Bu barədə Hərbi Prokurorluqdan məlumat verilib.

Bildirilib ki, Hərbi Prokurorluq orqanları ilə Müdafiə Nazirliyi, Dövlət Sərhəd Xidməti, Daxili Qoşunlar və digər hərbi qurumlar arasında yaranmış qarşılıqlı sağlam və işgüzar əlaqələrin, həmçinin birgə səmərəli fəaliyyətin, o cümlədən görülmüş qabaqlayıcı tədbirlərin nəticəsində Azərbaycan Respublikasının Silahlı Qüvvələrində 2024-cü ilin eyni ayı ilə müqayisədə 2025-ci ilin yanvar ayında qeydə alınmış vəzifə səlahiyyətlərindən sui-istifadə və ya vəzifə səlahiyyətlərini aşma cinayətləri 77,8% və rüşvətalma və rüşvətvermə cinayətləri 31,6% azalıb.

“2025-ci ilin yanvar ayında Azərbaycan Respublikası Silahlı Qüvvələrində əmri icra etməmə, fərarilik, silahla və ətrafdakılar üçün yüksək təhlükə törədən əşyalarla davranış qaydalarını pozma, maşınları idarəetmə və istismar qaydalarını pozma, qəsdən sağlamlığa ağır zərər vurma və qəsdən adam öldürmə cinayətləri qeydə alınmayıb”, – deyə məlumatda qeyd edilib.